【東京】2025素食餐廳推薦

東京真的很照顧素食朋友，無他，東京畢竟係全球最繁華的城市之一，萬家燈火，點綴城市每個角落，行不完、吃不完、東京嘅生活就係多姿多彩。今次行程去左5間素食餐廳，地點都好方便，一點都不難去。

延伸閱讀︰【東京手信】Échiré 評測｜$20塊貴族曲奇值唔值
 【東京】豪德寺 | 幸福滿滿的招財貓

_{【淺草】悅納 | 人氣素食擔擔麵}

悅納係由一位熱愛茶藝的中國老板所開。整間餐廳嘅裝潢就好似一間茶室，擺放著多款日式茶具，每一樣都像藝術品。餐廳空間寬敞，簡約清雅，環境超級舒服。

佢地最出名嘅招牌菜係素食擔擔麵，從湯底到食材都非常講究，老闆話佢地試過好多次配方先整出到呢碗招牌擔擔麵。

擔擔麵味道及口感很輕盈，麵條每日人手新鮮製做，所以入口特別Q彈，係製作過程中專門加入從捷克空運的野生蘑菇粉，入口時帶有微微的蘑菇香氣。湯底就選用新西蘭花生做嘅花生醬，味道超濃郁，微辣嘅味道搭配上鮮甜的蔬菜同特製「肉」味噌，令人食到舔舔脷，真係連湯都飲得哂，東京第一餐已經教我好滿足。

悅納 Injoy
地址：〒111-0033 東京都台東区花川戸１丁目９−１浅草駅前北口ビル３階
營業時間： 11:30~14:00 (週二休息)
網址︰https://tokyoinjoy.com/Home/

_{【淺草】Marugoto Vegan Dining Asakusa | 晴空塔下有機蔬食}

淺草除左悅納外，仲有另一間很有名素食餐廳Marugoto Vegan Dining Asakusa，由淺草車站步行10分鐘就到，就在隅田川旁，環境一流。Marugoto 平日營業時間11:30-15:00，同埋逢星期一休息，黎之前記得要book位，因為好多外國人同本地人會專程黎幫襯，如果walk in 的話就一定要準時到，否則有排等。今次因為walk in 的關係，安排坐係露天位置，望住晴空塔哂住太陽嘆住咖啡，真係好舒服同寫意。

餐廳主打全素、無麩質、無五辛同寵物友善，今次點左個招牌午餐同唐揚咖哩飯，皆因我超鐘意食香口濃味菜，同埋鍾意樣樣都有，滿足哂我乜都想試既願望。

沙律係用有機菜，味道鮮甜，配埋自家製素沙律醬，味道酸酸地加埋粒粒起沙嘅口感好清新。而野菜天婦羅同唐揚係用椰子油炸，完全唔覺得油膩，加埋個日式甜咖喱同玄米飯，完全好滿足。唯一缺點就係上菜時間比較耐，不過一場旅行就比自己慢活放鬆一下。

Marugoto Vegan Dining Asakusa
地址：1-chōme-3-3 Hanakawado Taito City, Tokyo 111-0033, Japan
營業時間：星期二至星期五（11:30am-3pm)
星期六&星期日（10am-5pm）
星期一休息
網址︰https://dining.marugotovegan.com/

_{【渋谷】 MASAKA素食居酒屋｜}
_{明星菜式唐揚}

去德豪寺要經渋谷轉站，下午行程就出發到渋谷去Shopping。
Lululemon、Onitsuka Tiger 、G-Star Raw 同 Columbia 係我哋主要掃貨對象，退埋稅大概係香港75折左右，咁啱遇上打折，價錢仲優惠，去渋谷 Shopping 真係半日都行唔晒。

而今次我地去左渋谷潮流聖地 Parco B1 地庫的 MASAKA 素食居酒屋，地方唔算好大，大概30個位左右，好典型嘅居酒屋風格。

食物種類唔算多，會列名有冇五辛成份，有部份菜式可以走五辛。我鐘情香口食物，必點名星菜式唐揚，呢到嘅炸雞一共有五種味道，有柚子胡椒、四川麻辣、蔥鹽檸檬、南蠻塔塔醬同埋照燒素沙律醬，五款醬汁都好吸引。素炸雞其實係大豆肉嚟，「雞皮」炸得脆卜卜，裏面係一絲絲嘅「雞肉」，外脆內軟，夠哂Juicy，有一刻錯覺以為係真雞肉，我就點咗照燒沙律醬Terimayo，個汁鹹鹹甜甜加埋沙律醬，非常惹味。

炸舞茸菇個皮炸得香脆同個炸漿調得好惹味，加埋椒鹽，裡面夠juicy，不過比較油膩，最啱配返杯冰凍薑啤。餃子就不過不失，麻婆豆腐偏向麻麻辣辣，整體真係唔錯，不過就有幾款售罄，值得再嚟多一次。

真さか MASAKA 居酒屋 Vegan Izakaya Masaka
地址：〒150-0042 東京都渋谷区宇田川町１５−1 渋谷PARCO B1
營業時間：12:00-22:00
網址︰https://www.instagram.com/vegan_izakaya_masaka

_{【鐮倉】Natudeco | 不時不食的鮮野菜}

去日本旅遊最緊要睇實時間同了解當地生活習慣，而今次我真係老貓燒鬚，本住自由行可以彈性安排，結果搞到自己趕頭趕命。

鎌倉位於東京近郊的海邊，係充滿歷史嘅古都，有多個賞花名所，古樸寺院，一望無際的海岸線同埋江之島，幸運的話仲可以見到富士山。有時間嘅話真係要留多兩日，好好感受歷史名城的古樸氣息及氛圍。

鄉郊地方主打不時不食，除左人氣鐵路餐廳外，最出名就係食當地野菜，因為大部分都係附近農家直送，保證新鮮。今次因為掛住行手信街小町通，無留意到當地餐廳營業時間，去到長谷寺附近，搵到一間叫Natudeco 素食咖啡店，但由於過左午市時間，已經關門，不過好好彩，老闆佢專登開爐煮俾我哋食，佢既好客之道真係令人好感動。

Natudeco貴精不貴多，沒有多餘的花巧，祟尚自然，強調食材嘅原汁原味。店內以木質為主，加上老闆自製嘅乾花，播上爵士樂，整體氛圍好有格調。

點咗每日限定10份嘅招牌套餐，套餐內嘅野菜種類按季節轉換，椰菜沙律清甜爽脆；梅子漬金筍帶有梅子香，酸酸地好開胃；牛蒡漬就比較咸，用嚟送飯一流；薏仁煮蘿白帶出蘿蔔既清甜；看似平平無奇的炒雜菜，其實最令人驚艷，當中的香煎蕪菁，個汁微辣加埋蕪青嘅爽脆口感，真係好好食；吉列車麩係日本素食界被稱為炸豬扒，外皮炸得香脆，內裡軟滑而帶一點煙韌，加埋味噌醬，口感勁豐富。

這裡的料理不僅味道出眾，更展現了對食材的尊重和對料理的用心，絕對是一家值得細細品味的餐廳。

Natudeco
地址：1 Chome-14-26 Hase, Kamakura, Kanagawa 248-0016日本
營業時間：08:00 -13:30 （Thu – Mon)
網址︰https://www.facebook.com/kamakura.natudeco/

_{【銀座】Ain Soph Ginza | 和風便當}

今次去東京完全冇計劃過任何行程，真係錯晒，好多間想食嘅米芝蓮餐廳都因為冇book位，所以就無緣了。

最後一日來到銀座潮聖，係銀座搵到間全素網紅店 – Ain Soph Ginza ，全間店都係純素，無蛋無奶無肉，完全係vegan friendly ，好多外國人同日本人都會嚟。好在去得早，遲啲啲都冇位。

餐廳一共有4層，地下主要賣純素烘焙，好多熱賣款式，包括日本當前大熱Butter Sand，而一至三樓就係餐廳，用餐時間只限90分鐘。基本上嚟親既客人都會點上招牌「福祿壽便當」，便當內一共有7款素食，承惠3500日元。福祿壽意指負責幸運・長壽・碌命等「三德」的神祇。3種料理分別使用黄・紅・綠三種吉祥的顏色表示「三德」，充滿寓意。

送上枱係一個二段木盒，打開後好吸睛，好有日本經典和食風味。先來前菜甘筍漬配提子乾，微微的酸挺開胃，而沙律以多種時令新鮮蔬菜拼成，好似一個秘密花園，散發出蔬食鮮甜清新的味道，係超級靚，最啱打卡。加埋核桃味噌醬，濃稠得黎好有kewpie 嘅口感。當然又係有我最愛的大豆炸唐揚，大豆雞肉好有口感，全無豆腥味。