【香港】緻素坊全新點心盲盒系列新登場

香港人習慣早上一盅兩件，睇下報紙傾下計，日上三竿又一Day。
喺香港提供純素中式點心嘅餐廳其實寥寥可數，而其中最出名的肯定係「緻素坊」。不論星期一至日，中午點心時段都係好旺場，想食嘅話最好提前一日book位。

緻素坊嘅點心特別之處係佢哋唔多用加工素肉，透過天然食材創作出如肉食般的口感，等大家重拾廣東懷舊點心的樂趣，食過一次完全顛倒對素食嘅睇法，素食無限可能。

即刻睇︰元朗「素」街系列 | 3大人氣傳統地道小食

緻素坊今次推出週末點心盲盒系列，一共有6款全新點心，每個星期六日會輪住出2款，完全估你唔到，好有驚喜。

✨^{_必食推介}✨

👑點心盲盒 – 紫蘇煎釀青椒🫑
以香菇等食材釀入青椒內，「肉」面及青椒保持鮮甜爽脆，唔會煮得過火變淋而喪失口感，煎得兩面外脆內軟一啲都唔易，加埋紫蘇獨特嘅香氣，散發陣陣餘香，夠哂入味，3條根本唔夠食。

👑點心盲盒 – 山珍野菌丸🍄
外貌同口感勁似陳皮牛肉球，但多咗一份檸檬葉嘅清香，立刻變得清新咗好多。香菇大大粒，好有咬口，沾埋喼汁，好食到唔識得講。

👑點心盲盒 – 素翅餃🦈
久遺的經典點心 — 魚翅餃，本身因為工序繁複，很多酒樓都唔再做，而家竟然喺緻素坊變咗做純素版，喺緻素坊內真係冇做唔到嘅嘢，只有你估唔到。魚翅餃皮透薄通透，皺褶細緻，加上仿翅，用料十足，連同行肉食嘅朋友都話好似。

👑新出單點 – 緻素坊魚蓉羹🐟
呢個純素魚羹不得了，係創辦人志哥佢去咗順德後，將當地有名嘅拆魚羹改造成純素版。魚羹內有聖瓜絲、木耳絲、豆腐絲、白蘑菇粒等，精彩之處在於勾成薄芡後，加入檸檬葉的清香及欖仁的焦香，令整體味道更加豐富，多了幾分層次，令魚羹的味道不再單調。

👑香菇燒賣 🍄‍🟫
食點心當然唔少得我最愛嘅燒賣，以靈芝菇作餡，帶有濃濃菌香，「啖啖肉」口感嫩滑，爆哂汁勁好食，皮薄餡靚，口感完全不輸傳統燒賣。

👑手撕杏鮑菇🍄‍🟫
鍾意香口嘅朋友必定會愛上，杏鮑菇手撕細條，加上惹味調味，炸得酥脆，好似食緊椒鹽白飯魚，會令人愈食愈上癮，基本上我每次都必叫。

👑冬季限量柑桔之皇 – 有機皇帝柑🍊
鍾意食生果嘅朋友，千祈唔好錯過冬季限定嘅皇帝柑。相傳係古代，佢係宮廷貢品，專門獻畀皇室，所以又叫「貢柑」。皇帝柑皮薄核少，散發出清新嘅果香，果肉粒粒分明，細嫩無渣，一咬即爆汁，帶住爽脆清甜。供應期通常只係得一個月左右。緻素坊自家農場有機種植，係零農藥，果皮哂乾後仲可以直接沖茶，帶有陣陣柑橘香氣。