中泰味美 | 地道泰國素食必食泰北素腸

要數香港由泰國人主理嘅素食店其實寥寥可數，除左九龍城最有名的泰國素食外，係隔離一個站嘅土瓜灣，就有一間地道泰國素莗餐廳「中泰味美」，皆因老闆娘信佛持素，自然造福人群。值得關注嘅係，所有素食食材都係由泰國直接入口，係香港市面屬於比較少有，甚至部份菜式真係只應此店有，同埋供應有限，分分鐘賣完就無。

中泰味美_土瓜灣_素食_To Kwa Wan_Chung Tai Mei Mei_Thai Cuisine_Vegetarian

中泰味美離土瓜灣地鐵站只有5分鐘路程，係一條橫街內，不過門面剛好搭棚，真係好容易錯過。店面不大，只能形容係一間好地道嘅泰國家庭式餐廳，就係泰國小區隨街可見個一種，講地道真係佢贏哂，最欣賞係佢地專為素食設有一本素食餐牌同埋可以走蔥蒜，大家自然食得放心。

中泰味美_土瓜灣_素食_To Kwa Wan_Chung Tai Mei Mei_Thai Cuisine_Vegetarian_Menu_菜單

我個人最鍾意食泰國小食，酸酸辣辣夠香口，真係食極都唔厭，所以必點炸魚餅、生菜包等等。事不宜遲，即刻開餐。

泰式魚餅

炸魚餅是泰國經典菜式之一，最初都只係諗住坊間圓形一小塊，而呢到嘅係隋圓形，食落仲有股檸檬葉的清香味，味道帶紅咖哩的香辣，口感軟嫩，點上酸辣醬，味道同質感都感夠媲得上真魚餅。

東北腸

東北腸(Sai Krok Isan)係一舊炸波波腸的物體，係清邁常見的街頭及夜市小吃之一，食落去其實係素肉，不過裡面就加入左糯米、紅咖哩醬、香茅、檸檬葉、南薑等等，食落外脆內軟，還有微微發酵的酸味，點上甜辣醬，其實挺惹味香口，愈食愈上癮，很啱我的胃口。不過因為炸的緣故，所以比較乾身，相信烤的話會更出色。

炸三拼

正如前言，餐廳一向隨心而行，第三次到訪特意點上炸三拼拼盤，拼盤選料也是很隨意，餐牌上基本所有炸物都可以做成炸三拼。今次點了老闆娘推薦的新菜式炸泰北腸、炸魚餅及炸豬皮。泰北腸(Sai Ua)源自泰北一帶，用腐皮包著素料、辣椒、青檸葉、香茅、大蒜、薑等，比起東北腸富有更香濃的香料及辛辣味，炸得外脆內軟，十分惹味。炸豬皮有2款，口感脆卜卜，最啱佐酒。